كتب – اية عبد الرحمن
“كان طبعه قاسي لكنه برضه كان جدع”.
الجملة دي كل ما تخبط في ودني في أغنية شيرين .. تخليني أنكش الذاكرة في طبيعة علاقتنا مع البعض ..
إيه اللي يخلي إنسان يقبل قسوة شخص في حياته في مقابل ميزة ممكن لو دور وصبر يلاقيها في شخص تاني ويبقى رحيم .. القسوة لا تبرر .. القسوة أذى .. أذى بين مش محتاج شفيع ولا تبرير ..
اللي يقسى عليك في لحظة يقدر يدوس عليك في أي وقت تاني .. ساعتها قولي بقى جدعنته دي تعوض إيه ولا إيه جواك من كسرة و وجع وتشوية لا بيرجع ولا بيتعالج الا من عند الله ..
الكوبلية ده خطير هو يبان انه في غنوة لطيفة بلحن جميل لكن الحقيقة هو واقع موجود جوانا .. يا ما قابلنا ناس قاسية وبررنا جوانا قسوتهم علينا بصفات تانية مش بنلاقيها غير بمزاجهم وأنانيتهم وقت ما يعوزوا ..
لما تلاقي حد قاسي عليك اهرب اجري بعيد وماتندمش ولا تعاتب نفسك وتقول لكنه برضه كان جدع .. يا أخي تمشي جدعنته في مقابل سلامك النفسي.
