كتب – اندرو محسن
أخيرًا شفت فيلم الحريفة امبارح. الفيلم يستحق الظهور القوي وغير المتوقع في شباك التذاكر. عناصر كتير بسطتني وأنا بتفرج، رغم إنه من نوع الأفلام اللي الواحد بيكون عارف هتمشي ازاي وهتروح فين، بس الفكرة هنا إنك تقدم الفكرة دي بشكل كويس، مع شخصيات حلوة ومسلية وده اللي حصل.
في واحد من مشاهد الفيلم، ماجد (نور النبوي) اللي جاي من طبقة غنية واضطر ينقل لمدرسة حكومية، بيغيّر في شكله ولبسه وطريقة كلامه عشان يقدر يجاري باقي الطلبة اللي معاه. زميله الششتاوي (أحمد غزي) بيقوله لا ارجع اتكلم إنجليزي أحسن من طريقة المسلسلات اللي بتتكلم بيها دي. ودي كانت من الحاجات الحلوه فعلًا في الفيلم، إنه فيه مجهود كويس في تقديم شكل المدرسة والطلبة اللي من طبقات أقل من متوسطة، من غير ضغط زيادة على استخدام مفردات بعينها زي ما بنشوف في مسلسلات كتير، ودي حاجه تحسب لمؤلف الفيلم إياد صالح، ومخرجه رؤوف السيد اللي واضح إنه بذل مجهود في الكاستنج أولًا وفي الشغل مع الممثل ثانيًا. النتيجة كانت فيلم مسلي جدًا ولو بتحب كرة القدم غالبًا هتلاقي نفسك متحمس زيادة مع الفريق والأهداف، حتى لو فيه بعض مشاهد كانت متوقعة أكتر من اللازم أو تفاصيل مش واضحة كفاية، فهي لم تفسد التجربة ككل.
الحاجة الأخيرة اللي عايز أقولها عن الفيلم هي إن الممثل أحمد غزي ده شاطر بشكل ملفت وفيه صدق في الأداء بتاعه، وأتمنى أشوفه في حاجات تانيه مهمة الفترة الجاية.
