كتب – عمر طاهر
أكتر حاجة لا تنفع معاها حناكة و لا خبرة ولا احتياطات هي المقالب اللي بتاخدها في الناس.
الهدر اللي بتاخده في مقالب الناس بيتناسب طرديا مش مع حجم ثقتك في الشخص التاني جوة العلاقة لكن مع حجم ثقتك في نفسك إنت.
بتفضل تنزل على وشك بالأقلام بسبب خساير بتبقى حاسس إنها ماتتلمش .. ثقة ووقت وعمر و أحلام وخطط .. بتواجه كارثة خمسين شراكة اتفضوا مرة واحدة.
الأسئلة اللي هتجننك غالبا مالهاش علاقة بالطرف التاني.. ليها علاقة بنظرتك لنفسك اللي هو ازاي أنا كنت أهبل مغفل .. طيب ازاي كنت أعمى ماشوفتش في اللي قدامي اي حاجة تقول إنه ندل واطي خاين قليل الأصل؟
ولا انا شوفت وطنشت؟ اه .. ده بقى خازوق له عذاب من نوع تاني.
طب هل الهدر اللي اخدته ده هيعلمك وهيحميك من هدر تاني؟ مش شرط
بالعكس ده الإفيه الموجع الكارثة إنه ممكن ماينقذكش من هدر تاني مع نفس الشخص.. هي هي نفس العلقة بالمللي.
العلاج دايما والشفا عند الناس الحلوة اللي بتحبك في المطلق الناس اللي انت بترد على كل خمس اتصالات منهم على واحد و لا بيزعلوا ولا بيبطلوا يحبوا فيك.
العلاج انك ماتدورش على تفسير إلا لو هتتعلم حاجة .. لكن تدور على تفسير علشان تقعد تلطم مش هتخلص هتلطم و تجيب أولاد خالتك يلطموا معاك.
العلاج انك تتفرج على خسايرك اللي حصلت لما الشخص ده اداك المقلب عند النقطة دي.. و تقارنها بحجم الخساير اللي كان ممكن تحصل لو الهدر حصل في نقطة متقدمة اكتر .. علشان تسجد سجدتين شكر و تحمد ربنا ان الهدر جه بدري قبل ما يبقى الوجع كارثة.
المقلب عادة مابيبقاش حصل وخلاص لا ده بيفرخ ويفتح لك كل شوية مساحة لرؤية ماضي العلاقة والحاجات اللي طنشتها و ماوقفتش عندها في وقتها.. اوعى تقع في الخية دي ..
العلاج انك تبطل تنخور في الجرح لإنه عمره ما بيلم غير بالوقت والتجاهل وانك ترمي الدرس اللي اخدته في ملفات المخ و تسيبه يقدم نفسه وقت الحاجة.
الناس حلوها حلو قوي .. ووحاشتها وحاشة بتأثر في أمم..
و عمر الموضوع ما كان فيها على قد ما كل حاجة عندك انت..
بتشوف اللي حصل معاك ازاي هنا المقلب.. و هنا السلامة.
(نقلا عن صفحته بالفيسبوك)
