كتب – ولاء السيد
أنا ملاحظة إن التفكير عند معظم الستات والبنات بقى مشوه بطريقة غبية.
هو إيه اللي بتشتغلي عشان ماتبقيش أقل منهم؟ وعشان مامتبقيش عالة على الرجالة؟
أنتي عبيطة؟ لو عبيطة قولي .. يعني أنتي هتبقي شايلاله بيته وبتربيله عياله وتنزلي تشتغلي عشان ماتبقيش عالة؟ (أنتي كدا هتبقي آلة مش عالة).
مين قالك إنه لو بيصرف عليكي تبقي عالة؟ ده غصب عنه وحق من حقوقك وواجب عليه ولو ماعملهوش يبقى آثم وربنا هيحاسبه!
ويعني إيه عشان لو غدر بيكي في يوم؟
لو هتتجوزي واحد مش مآمناله وخايفة يغدر بيكي ماتتجوزيهوش أصلًا، أنتي بتتجوزي عشان تحسي بأمان وسكينة .. لو مش حاسة بدا يبقى بلاها جواز.
عزيزتي المرأة، عايزة تشتغلي اشتغلي، ده حقك .. كل واحد عنده شيء بيخليه يحس بقيمته الذاتية، لكن لو هتشتغلي وتضغطي نفسك في بيت وشغل لمجرد إن اتزرع جواكي أفكار مغلوطة إنك عالة أو المجتمع وصلك كدا فاسمحيلي أقولك إنك غلط والمجتمع غلط، والعالة الحقيقي هو اللي مابيقومش يعمل كوباية شاي لنفسه.
