كتب – اية عبدالرحمن
تأكد ان أي حاجة مضيقاك وشاغلة تفكيرك بالسلب انت السبب فيها .. أيوة .. زي ما حضرتك قريت كده .. ببساطة عقلنا ده عبارة عن مساحة فاضية كبيرة وانت اللي بتقرر تزحمها بإيه .. ممكن تزحمها بأهدافك .. طموحاتك .. أشخاص بتحبهم .. أشياء مادية أو معنوية بتفرق في سعادتك .. وممكن برضه تشغلها وتزحمها بمواقف مؤلمة وشخصيات سخيفة في حياتك وعداوات داخلية مكبوتة مستنية الفرصة لتفريغها .. وبالتالي تبدأ زحمة عقلك اللي هي جايه منك انت وحدك تسيطر عليك وعلى روحك ونفسيتك وماتبقاش عارف مالك هو انا متنرفز ليه هو أنا مابقتش راضي ليه وجوايا ألف وجع وعندي صداع دائم مابيفارقنيش..
الحقيقة انك محتاج تتدرب .. تتدرب إزاي ترتب أولويات زحمة عقلك من أفكار و أشخاص وأهداف اللي من خلالها هتلاحظ الفرق في نفسيتك وصحتك الجسدية كمان .. لو رتبت أولوياتك بشكل إيجابي هتلاقي روحك ونفسيتك وجسمك استجابوا بشكل فوري .. لو حولت السخط في عقلك لامتنان هتلاقي نفسيتك بقت راضية وفيها سكينة وهدوء انت نفسك هتستغربهم وصداعك الدائم هيقل .. ولو فضلت مكانك ساخط متعصب وطاقة عقلك كلها غضب بسبب زحمة عقلك هتفضل روحك ونفسيتك وصحتك واقفة محلك سر وبتسوء أكتر .. حتى لو فشلت مرة في تدريب عقلك في الاستجابة لقرارك الجديد حاول تاني وتخيله كده انه أوضه بتحاول ترتبها من كركبة متراكمة جواك من سنين .. هتفرق.
