كتب – اندرو محسن
هناك أفلام تستحق الانتظار، الوصف ده ينطبق على فيلم رحلة 404 للمخرج هاني خليفة، الفيلم اللي بقالنا سنين منتظرينه.
فيه حاجات كتير ممكن أبقى أكتبها في مقال مفصل عن حلاوة السيناريو والتمثيل، ودقة المخرج في الإحساس بموضوع الفيلم كله، بس اللي عايز أقوله هنا هو إننا فعلًا بقينا مفتقدين أفلام بالجودة دي والشكل ده في السينما المصرية، الأفلام اللي تقدر تكون جماهيرية وتوصل لشريحة كبيرة من المشاهدين وفي نفس الوقت فيها عناصر الأفلام الفنية.
أفلام ممكن نقعد نتكلم عنها بعد ما تخلص لمدة طويلة عن إيه الحلو هنا وإيه اللي كان ممكن يبقى أحلى، هل المشهد ده كان مميز أكتر ولا ده، دوافع الشخصية دي كانت قوية كفايه ولا الشخصية التانيه دي مكتوبة أحسن، إيه اللي ورا الشخصيات دي كلها وممكن تخلينا نفكر في إيه. فيلم يروّح معانا بعد ما نشوفه ويبقى الواحد حاسس إنه شاف فيلم ممتع، ويفكر كمان إمتى هيشوفه مرة تانية.
أتمنى مانستناش فترة طويلة تاني عشان نشوف حاجه زي رحلة 404.
