مفيش مشكلة لو اتأخرت في الجواز

كتب- رانيا السيد
مفيش مشكلة لو اتأخرت في الجواز..
فركش ألف خطوبة لو مش حاسس إن دا الشخص المناسب..

سيب الشغل اللِي بيستهلكك وبيهدر قيمتك وآدميتك والأرزاق على الله..
امشي من المكان اللِي مفيهوش راحتك..
قوم من القعدة اللِي مش مقامك..
اهجر الناس اللِي مش مقدرة وجودك..

متختارش اختيارات غلط عشان الناس قالت وعادت وضغطت عليك..
وقت ما هتكتئب وتندم وتتعب هتكون لوحدك، هتقع ومحدش هييجي يطبطب عليك ويقولك معلش أنا زقيتك في الاتجاه الغلط وكنت سبب في وقعتك دي..

شوف كام حد حواليك حسبها بحسابات الناس واختار غلط فعاش حياة الناس هي اللِي اختارتهاله وهو غريب عنها ومش حاسسها ولا حاببها ولا مبسوط بيها، وبعدها انطفى واتدفن وبقى مجرد جسم بيتحرك بطريقة آلية من غير روح ولا مشاعر بعد ما كان كله طاقة وحيوية..

متموتش نفسك عشان تعيش في نظر الناس..
راحتك النفسية أهم من كلام الناس ومعتقداتهم القديمة المتهالكة الرجعية اللِي متسواش مليم في تراث البشر الحضاري والثقافي.