هل في حد مراعي خاطرك

كتب – أحمد سليمان 
من الاحتياجات الإنسانية المهمة جدا إنك تحس انك (متراعى)..
بيتراعى خاطرك..
بيتراعى أكلك وشربك وشغلك ومواضع راحتك..
إن حاجتك متشافة ومتقدرة..
إن إللى معاك شايف راحتك فين وبيعمل جهده إنه يوفرهالك..
إنك تحس إن كل حاجة بتعملها متقدرة ومتصان فضلك ومعروفك حتى لو كان مجرد إنك بتقوم بواجب عليك بس بتلاقى قصاده تقدير ..
الزوج إللى بيقول لزوجته (هو إنتى بتعملى إيه يعنى زيادة عن إللى بتعمله الستات)..
ولا الزوجة إللى بتقول لزوجها (ده واجب عليك وده حقى عندك)..
هو فعلا حق وواجب ودور.. بس محتاجين من بعض تقدير علشان نقدر نكمل.. علشان نقدر نعافر.. ما هو حتى الواجب ده محتاج مجهود.. محتاج دفعة.. محتاج كلمة تشجيع نشحن بها طاقتنا إللى بتخلص..
محتاجين سقفة ..طبطبة ..
لما بنقابل عمل بعض بلا مبالاة أو إنكار.. بينكسر خاطرنا ويمكن قلوبنا ونفوسنا..
جبر الخواطر عبادة.