كتب – سامح لاشين
هي الخناقة كبيرة اوي للدرجة ديه؟
الموضوع مش محمد صلاح بس ده اختزال مخل للتفكير في أسباب المشاكل اللي بنعاني منها .. وبصراحة الموضوع مش كرة بس ده بينسحب على طريقة تفكير عامة تنتظر من البطل أعمال خارقة أو بالأدق احنا طوال الوقت بنحاول نصنع بطل على أساس إنه يمتلك عصا سحرية يحل بيها جميع مشاكلنا .. هكذا نتصور وفي الحقيقة بننسى واحنا بنصنع البطل إني إحنا بنصنعه وهو ممكن يكون إنسان عادي ونجاحه أمر طبيعي ووارد .. بس المبالغة أحيانا بتيجي من محيط ملئ بالفشل والمبالغة والهوس أحيانا بالشخص البطل بتعمل صدمة كبيرة لما نبدأ نكتشف إن عصر المعجزات خلص و إن البطولة وهمية.
الصدمة الأكبر حينما نكتشف إن البطل المصنوع هو أساس المشكلة وهو وراء الإخفاقات والفشل .. ملحوظة أنا لا أتحدث عن صلاح في شخصه نهائي نجاحه أو فشله عمل حاجة للمنتخب ولا لاء .. أقصد إن المشكلة فينا احنا تخيلنا إن صلاح ممكن يجيب كأس العالم وهو نجح ببساطة في الإحتراف لإنه شغال في منظومة حقيقية مش بتعتمد على نظرية البطل المفروض إن المنظومة الناجحة تمنح الحجم الحقيقي لكل إنسان وتخرج منه ما يصنع نجاحه ونجاحها..
أما المنظومات الفاشلة اللي بننضوي تحت مظلتها فبتعتمد على نظرية الفرد صلاح هيجيب كل حاجة وهي منظومات فاسدة وفاشلة .. الزعيم هيحللنا كل مشاكلنا والحقيقة هو السبب وراء كل الفشل اللي بنعاني منه.
