شاريهان أبوكيلة
فيلم رحلة 404 من أروع الأفلام اللي ممكن ننزل نروح سينما نتفرج عليها سينما بجد رجعتني لأفلام مني زكي القديمة وزمن الأفلام اللي تستحق اننا ندخل سينما علشانها وموضوع مهم مفتكرش ان في موضوع ممكن يطرح احسن من كدة وهو صراع البني آدم مابين مغريات الدنيا والرجوع الي الله.. وفي الاخر اختيارك لربنا وتحديك لكل الظروف الصعبة رغم كل المغريات.. حاجة في منتهى الروعة هدف ورسالة عظيمة وقيمة فنية.
منى زكي طبعا رائعة وصلت لمرحلة من النضج الفني اللي ميتقارنش باي حد من كتر ما هي بتهتم بتفاصيل الشخصية بطريقة كلامها في لبسها في الباك جراوند بتاعها لو قعدنا نتكلم عن كمية التفاصيل مش هننتهي غير بان مني زكي وصلت لانضج مراحل الفن والتمثيل.
مباراة تمثيل قوية جدا بينها وبين محمد فراج أثبتوا جدارتهم للمرة الثانية في الوقوف امام بعض بعد لعبة نيوتن والعين بقيت تحب تشوف وتستمع بتمثيل الاتنين قصاد بعض من كتر حقيقتهم واقناعهم.
فيلم يستحق المشاهدة هيرجعك لأيام ماكان في سينما بجد.
