كتب – أحمد السيد
انا عمري ما ندمت علي خسارة شخص ايا كان هو مين وده لاني بعمل اللي عليا وزيادة وعندي طاقة تمسك باللي قدامي مش طبيعية ، بغير واسامح وبحتوي المواقف وباجي علي نفسي ومتصالح مع فكرة ان كل العلاقات فيها مشاكل حتى علاقتك بالبواب .. وعادي نقصر في حق بعض ما احنا بشر ! وبلتمس العذر دايما للي قدامي.
لكن لما بيجي عليا وقت واقرر ابعد ف ده معناه ان الشخص ده استنفذ كل فرصة وهو اللي وصل علاقتنا لكدة وفي الحالة دي مستحيل اندم علي خسارته بالعكس ده انا اللي كسبان لما ابعد عن شخص معندوش اي استعداد انه يتمسك بيا او يعملي خاطر.
وبرجع اقول لنفسي ما اللي يروح يروح دا ربنا بيقول ( يؤتكم خيرا مما اخذ منكم ) مش زيه لا دا أجمل وأفضل واعظم .. انا واثق دايما من عوض ربنا وواثق اني عمري ما بخلت بجهد او اي حاجة تخلينا نستمر ودايما كنت بدي اللي بقدر عليه واعرف اعمله
بس النهاردة خدت قرار مهم في حياتي هو اني هتعامل مع حياتي حسب راحتي النفسية وهعتبر راحتي النفسية سبب رئيسي لاستمراري في اي حاجة اللي هو لو وجودك هيبقي خفيف ولطيف يا اهلا وسهلا بيك وهتلاقي مني كل حاجة حلوة ولو وجودك هيضغط عليا وهيرهقني نفسيا يبقي مع الف سلامة ومش هتلاقي مني غير شخص بيحاول يحافظ علي سلامه النفسي بكل الطرق الممكنة.
ومهما عملت مش هتعرف تغير من طبع انسان حتى لو قدمت الود اطنان هتضيع وقتك وطاقتك بدون نتيجة او هيعاملك كويس مؤقتا وفجأة هيلدغك بدون مقدمات .. وهتسال نفسك انا عملت ايه عشان يعمل معايا كدة انا حاولت وقدمت كل حاجة ليه يعمل معايا كدة.
مش هم تلاقي اجابة.. المهم سلامك النفسي .. انا النهاردة عرفت فعلا ان الضغط العصبي والنفسي والقلق والتوتر ممكن يضعف القلب.
