كتب – نيفين هاني
أنا عندي مشكلة مع ذبذباتي الطاقية.. إن كل ما تامر حسني أو رامي جمال ينزل أغنية نكد أحبها وأنسجم معاها وأفضل أعيد وأزيد فيها.
تامر حسني من قريب منزل أغنية حزينة دمار شامل، حبيبته سابته معرفش ليه وقاعد بقى فالأغنية يولول ويرقع بالصوت بس بإحساس عالي جدا.. وأنا في قمة الانسجام ومتعاطفة معاه جدا ولاقية نفسي عمالة أكرر الكلمات لإن اللحن روعة، لما ركزت فالكلمات لقيتها مصيبة، توكيدات سلبية.
من كتر ما بيغني بإحساس كنت عاوزة اقوله سيبك منها والله ولا تستاهل تحرق دمك عليها بكرا تاخد ست ستها.
تامر حسني بادي السنة بداية قوية جدا نفس مستوى أغانيه القديمة الحزينة، من زمان مجبش الإحساس العالي اوي ده في أغنية.
