كتب – سحر نوح
انا سافرت دول كتير سواء أوروبية أو عربية واول مرة في حياتي أسافر السعودية وتحديداً مدينة الرياض.
وعاوزه أقول إني حقيقي متفاجئة بجمالها ونضافتها ورقي الشعب السعودي في التعامل ناس كلها بشوشة الوجهه حلوة اللسان في منتهي الإحترام والود وبيحبوا المصريين.
شوارع نظيفة مافيهاش ورقة مرمية علي الأرض طول مانت ماشي شامم ريحة حلوة. احترام القانون والمرور ومطبق علي الكل ماشفتش حد سايق وماسك موبايل ولا بياكل وبيرمي بواقي اكله في الطريق، تدخل اي محل يقابلوك بكلام طيب وترحاب ويضايفوك كمان بالقهوة العربي وسواء إشتريت أو لا بيسلموا عليك ويتمنولك يوم سعيد ..
ورحت النهارده البوليڤارد الركن المصري مبهر كإنك فعلا سافرت مصر ورحت الأزهر والحسين والهرم، كل العمالة هناك مصريين فرحانين ومبسوطين ومشغلين اغاني مصرية ومحلات اكل مصري ومنتجات مصرية بتتباع للزوار والمكان زحمة جدا اكتر مكان الناس فرحانة بيه رحت كل ركن المكسيكي .. الهندي .اليوناني.. الأسباني.. الإيطالي تحس انك فعلا سافرت البلد بريحتها وشعبها واكلها ومنتجاتها ..ز حام غير طبيعي لكن كله مبتسم وكله مبسوط .. حقيقي تجربة بالنسبة لي مفاجأة ولو انكرت ده يبقي ماعنديش مصداقية أو ضمير .
وبالمناسبة أنا مش رايحة معزومة علشان أجامل أو أنافق أي حد ..أنا رايحة علي حساب زوجي بماله الخاص من الألف للياء.
