ليه أحب “السفيرة عزيزة” الجبانة والمستغلة

كتب – خالد محمد

مش فاهم إيه اللي خلاني وخلي أستاذ أحمد يحب السفيرة العزيزة..

شخصية ضعيفة وأنانية ومستغلة وبتاعة مصلحتها.. عاشت ذليلة مع أخوها الجزار اللي واكل حقها في ميراثها وبيضربها وبيعاملها أسوأ معاملة، لا اعترضت ولا اشتكت..

أول ما شافت الجار الجديد رسمت عليه.. سابت كل جيرانها القدام وطلبت مساعدته يجيب لها الداية لمرات أخوها.. دخلت بيته تنضف وتطبخ.. قابلته من ورا أهلها.. وأول ما بقى جوزها رسمي اتحولت فجأة لـ شجيعة سيما.. وعايزاه يقف قدام أخوها البلطجي ويجيب لها حقها..

يوم دخلتها اتخانقت معاه وأهانت كرامته أكتر من مرة لأنه في نظرها جبان، وسابت له البيت لما رفض يخش مع أخوها في خناقة عشان يجيب لها مبايعة بيتها.. لا فرق معاها أخوها يضربه أو يقتله.. عادي المهم يجيب لها حقها.. ومرجعتش بيتها غير لما جوزها فعلا اتخانق مع أخوها وضربه ورجع لها حقها، ورغم كل ده أستاذ أحمد فضل يحبها ومسبهاش.
أستاذ أحمد.. إنت أهبل.