كتب – محمد ابراهيم
في فيلم اسمه “لا تبكي يا حبيب العمر”، بطولة فريد شوقي ونور الشريف، كان نور الشريف عنده ورم في المخ وهيموت وباباه فريد شوقي هوّ الطبيب الجراح اللي مفروض هيعالجه.
فريد شوقي لما عرف خبى عن نور الشريف عشان ميعرفش.. ولما نور عرف قال لباباه: “حقيقي أنا مش زعلان.. أنا مرة قريت حكاية في كتاب عن واحد راح زار بلد، فمر على المقابر لقى على كل مقبرة لوحة، اللي مكتوب عليها عاش ١٦ شهر، واللي مكتوب عليها عاش ٤ أشهر، واللي عاش ١٠٠ يوم بس !!
فسأل ايه حكاية الناس في البلد دي!! ليه بيموتوا صغيرين كده؟!
قالوا له لأ.. دي عدد الأيام السعيدة اللي عاشوها في حياتهم، لأننا بنحسب عمر الإنسان بعدد الأيام السعيدة اللي عاشها بس!.. أنا عشت ٢٤ سنة سعيد وأنت السبب، خليت كل أيامي ضحك وسعادة، اديتني كل حاجة حلوة في العالم، اديتني كل اللي تمنيته.. أنا لو مت هزعل ع حاجة واحدة بس.. إني مش هشوفك وانك هتوحشني.
العمر بينا وبين اللي بنحبهم مش بيتقاس بالزمن اللي عشناه سوا.. ياما ناس عاشوا العمر كله سوا لكن رصيدهم مع بعض قليل أو مش موجود.. وناس مروا علينا وراحوا لكن سابوا ذكريات محفورة في القلب والروح تكفي عمر بحاله.
