ندى لاشين
عندي يقين دائم إن ربنا بيسخر أطيب وأصدق عباده معاه في مساعدة غيرهم من غير ما يستنوا المقابل من أفعالهم لخلق الله .. بعتبرهم دايمًا جنود ربنا في الأرض هتلاقيهم وقت ازمتك ظهروا وطلعوا يساعدوك ويدعموك فجأة وانت في أضعف حالاتك ومش عارف تتصرف إزاي ولا تعمل إيه! هتلاقيهم بدون سابق إنذار ولا حسابات هما اللي بينقذوك من أزمتك ..
في الحقيقة هو ربنا اللي بينقذك في صورة جنوده دول .. اللي بالمناسبة ممكن مايعرفوش ولا يدركوا انهم سبب فارق في نجدتك .. هما اللي يعرفوه انهم لازم يكونوا في ضهرك في وقت ضعفك و معندهمش اختيار تاني معاك .. لا مستنين منك مقابل ولا عاوزين منك مصلحة ولا محتاجين منك شكرًا حتى .. بتلاقيهم بيقوموا بدورهم وينسحبوا في هدوء وممكن ماتشوفهمش تاني في طريقك بعد كده كمان .. بس هتفضل فاكرهم و واخدهم نموذج خير في حياتك تحاول وتجاهد انك تبقى في مكانتهم عند ربنا لعلى سبحانه يختارك تبقى في صحبتهم ويسخرك جندي من جنوده في الأرض للتيسير على الناس.
