كتب – محمود عبد الرازق
“باحبك” ولّا “بحبك”؟
الأصحّ في الكتابة بالعامية “باحبك” مش “بحبك”
أولًا: الباء دي بيسموها باء المضارعة المصرية أو العامية، من غيرها الفعل المضارع هيبقى مستقبل.
يعني لو قلنا “باشرب شاي” فالكلام في المضارع.
ولو قلنا “أشرب شاي” فالكلام عن المستقبل.
ثانيًا: الباء دي بتدخل على المضارع، وتسيب فيه حرف المضارعة العربي (الهمزة والنون والياء والتاء).
مثلًا الفعل “يحب” بتدخل عليه الباء يبقى “بيحب”.
افعل “نحب” بتدخل عليه الباء يبقى “بنحب”.
الفعل “تحب” بتدخل عليه الباء يبقى “بتحب”.
اشمعنى مع “أحب” هنحذف الهمزة/الألف؟
فالصح نسيب حرف المضارعة العربي، اللي هو الهمزة
ونخفّفها لأنها في وسط الكلام فتتحول لهمزة وصل تُرسَم ولا تُكتَب
ونحط قبلها باء المضارعة المصرية
فيكون الناتج “باحبك” مش “بحبك”
زيها برضه حرف التسويف في العامية، الهاء أو الحاء أو العين:
الفعل “يحب” بتدخل عليه الهاء يبقى “هيحب”.
الفعل “نحب” بتدخل عليه الهاء يبقى “هنحب”.
الفعل “تحب” بتدخل عليه الهاء يبقى “هتحب”.
اشمعنى مع “أحب” هنحذف الهمزة/الألف؟
فالصح نسيب حرف المضارعة العربي، اللي هو الهمزة
ونخفّفها لأنها في وسط الكلام فتتحول لهمزة وصل تُرسَم ولا تُكتَب
ونحط قبلها هاء التسويف العامية
فيكون الناتج “هاحبك” مش “هحبك”
طبعًا هيقول القائل: يا عم دي عامية، بتحكم عليها بقواعد الفصحى ليه؟
هاقول له: لأنها مكتوبة بحروف عربية، وبالتالي بتاخد كتير من أحكامها الإملائية من الحروف العربية.
ماشي يا قائل؟
